nuk e di a e keni vënë re edhe ju, por sa më të pista bëhen rrugët e tiranës, aq më të pastër bëhen politikanët e rinj. fytyrat e tyre telegjene nuk kanë asnjë pore të zgjeruar; syzet me skelet gri nuk dalin një milimetër jashtë kornizës së fytyrës së rruar taze. kostumet janë të freskëta nga frigoriferi, aq të ngrira duken, dhe pasqyrojnë buzëqeshjet e tyre prej studenti të stomatologjisë. imazhi i një agjenti të bursës bën më shumë efekt te sheshi skënderbej se në wall street, mesa duket. vetëm kollaret i kanë jashtë mode se i zgjedhin me ngjyrat e partive, plus që janë të ndritshme dhe tepër të fryra, po le të themi që disave të paktën i shkojnë me sytë. më duket vështirë të besoj që njëri, i cili hekuros dhe flokët çdo mëngjes, ta marrë seriozisht këtë punë me aq përgjegjësi sa ç'është kujdesi për një popullsi të tërë, shumica e të cilës nuk ka as ujë për tu larë. s'kanë dhe faj po të mendosh pamjen e gjeneratave para (pas enverit, se ai ishte si topmodel, thonë disa), po ndërsa ata ishin më origjinalë e reflektonin personalitetin e tyre, këta të sotmit duken të gjithë njësoj. si kallëpa sapuni lux me aromë trëndafili artificial. disa kanë edhe të dashura e të fejuara që mundohen t'ja rrisin dhe më shumë vlerën estetike burrave te tyre duke u stilizuar si jackie o., po në fakt shpesh nuk arrijnë dot as carla bruni-n. relaksohuni, njerëz! jo për gjë, po keni arritur maksimumin e perfeksionit kaq të rinj! ç'ju ngel për të bërë kur "të rriteni”?